360° View Monitor sistemi avtomobilin ön, yan və arxasında yerləşən dörd kamera vasitəsilə ətrafı mərkəzi displeydə göstərir. Ön və arxadakı səkkiz parkinq sensoru isə avtomobil qaraja girərkən və ya çıxarkən, T-şəkilli kəsişmələrə yaxınlaşarkən və ya dar yolda qarşıdan gələn avtomobili keçərkən siqnal səslərinin də köməyi ilə təhlükədən qaçmağa kömək edir.

Mazda-nın insanmərkəzli mühəndisliyinin avtomobillərin hərəkətini daha həssas, daha inamlı və daha rahat etməsinin daha bir yolu GVC Plus-dır. Siz döngəyə daxil olduğunuz anda GVC Plus çəkini ön təkərlərə ötürmək və qavramanı yaxşılaşdırmaq üçün mühərrikin fırlanma anını bir qədər azaldır. Döngəni keçdikdən sonra isə daha çox sabitlik əldə etmək üçün çəki arxaya ötürülür və mühərrikin fırlanma anı bərpa olunur. Düz xəttli hərəkətə keçmək üçün sükanı mərkəzi vəziyyətə qaytarıb döngədən çıxmağa çalışanda əyləc gücü xarici ön təkərə tətbiq edilir. Bircə qüsursuz idarəetmə əməliyyatı ilə sükan korreksiyasına ehtiyac, kuzovun yırğalanması, uzun yollarda stress və yorğunluq azalır.

Skyactiv Texnologiyasının təkmilləşdirilməsi və tamamlanması sayəsində səfərlər zamanı rahatlığın və dincliyin artırılması üçün yeni imkanlar açıldı. Beləliklə Mazda yeni Skyactiv-Vehicle Architecture inkişaf etdirdi. Bu, sürücü və sərnişinlərə hərəkət zamanı tarazlığı rahat və təbii şəkildə saxlamağa kömək edən tam-avtomobil yanaşmasıdır. Məsələn, oturacaqlar çanağı düzgün bucaq altında tutmaq, onurğanın təbii S-şəkilli əyrisini saxlamaq və başın hərəkətini sabitləşdirmək üçün xüsusi olaraq hazırlanıb. Yay və amortizator xüsusiyyətləri isə kələ-kötür yollardan keçərkən başın önə-arxaya hərəkətini minimuma endirmək üçün incəliklərədək düşünülüb. Nəticədə yorğunluq daha az olur, uzun səfərlərdə belə rahatlıq hissi sizi tərk etmir.

RCTA geriyə dönmə əməliyyatları zamanı hər iki tərəfdən yaxınlaşan avtomobilləri aşkar etdikdə sürücünü xəbərdar etmək üçün BSM ilə eyni sensorlardan istifadə edir. Xəbərdarlıq qapı güzgüsündəki yanıb-sönən indikator və səs siqnalı ilə ötürülür.

BSM arxadakı və yandakı kor nöqtələrdə olan avtomobilləri aşkar etmək üçün 24 GHz kvazi-milli dalğa radar sensorlarından istifadə edir və avtomobili aşkar edərkən dönmə siqnalından istifadə edərək vizual və səsli xəbərdarlıqları işə salır.

ALH gecə vaxtı potensial təhlükələri təyin etmək üçün daha çox dəstək verir. Sistem gecə görmə qabiliyyətini yaxşılaşdırır və avtomatik idarə olunan Glare-free High Beam (20-yə bölünmüş LED massivi ilə tənzimlənən işıqlandırma diapazonuna malikdir) və Wide-range Low Beam sayəsində sürücüyə təhlükəli vəziyyətlərdən qaçmağa kömək edir.

SCBS R arxa bamperdə quraşdırılmış ultrasəs sensorları sayəsində təxminən 2-8 km/saat sürətlə geriyə gedərkən arxada olan avtomobilləri və maneələri aşkar edir. Bir obyekt aşkar edilərsə, sistem toqquşma zamanı zərərin azaldılmasına kömək etmək üçün avtomatik əyləcləməni işə salır.

Advanced SCBS yüksək performanslı irəli görüş kamerası ilə qarşıdakı avtomobilləri və piyadaları* aşkarlayır və toqquşmanın qarşısını almaq, toqquşma nəticəsində yaranan zərəri azaltmaq üçün avtomatik əyləcləməni işə salır. Sistem təxminən 4-80 km/saat sürətlə hərəkət edən nəqliyyat vasitələrini və təxminən 10-80 km/saat sürətlə hərəkət edən piyadaları aşkar edir. Üstəlik gecə vaxtı piyadaları aşkar etmək və daha geniş diapazonda effektiv çalışmaq üçün təkmilləşdirilmişdir.

MRCC öndəki avtomobilin sürətini və məsafəsini təyin etmək və ölçmək üçün milli dalğa radarından istifadə edir, təhlükəsiz ara məsafəsini saxlamaq üçün mühərrikə və əyləclərə davamlı nəzarət edir. Öndəki avtomobil zolağını dəyişirsə, sistem əvvəlcədən müəyyənləşdirilmiş sürətə qədər sürətlənir. Öndəki avtomobil yavaşlayırsa və ya dayanırsa, sistem yavaşlayır və lazım olduqda avtomobili dayandırır. Sistem 0-145 km/saat arasında istənilən sürətdə çalışır, bu da öndəki hərəkəti istənilən halda izləməyə imkan verir.